Bakı Nəqliyyat Agentliyinin (BNA) Nəqliyyatı İntellektual İdarəetmə Mərkəzindən (NİİM) Milli.Az-a bildiriblər ki, paytaxtda aparılan təmir işləri ilə əlaqədar aprelin 30-dan etibarən Azadlıq prospektinin Ziya Bünyadov prospekti ilə kəsişməsində yerləşən avtomobil tunelinin girişindən Cəfər Xəndan küçəsinin kəsişməsinədək olan hissəsində M.Ə.Rəsulzadə qəsəbəsinə doğru olan istiqamət üzrə avtonəqliyyat vasitələrinin hərəkəti müvəqqəti olaraq məhdudlaşdırılıb.

Bundan başqa, yolda aparılan təmir və tikinti işlər ilə əlaqədar Neftçilər prospektində, Azadlıq meydanının qarşısında yolun 3 zolağı bağlanıb.

Neftçilər prospektinin Azadlıq prospekti ilə kəsişməsindən Puşkin küçəsi ilə kəsişməsinədək olan hissəsində də yolun 2 zolağı bağlıdır.

Eləcə də Alfred Nobel prospektində, "ASAN Xidmət" mərkəzinin qarşısındakı yol Zığ şossesi istiqamətində yeni yeraltı keçidin tikilməsi ilə əlaqədar olaraq bağlanıb. Alternativ olaraq sürücülərdən Yeni Bulvar ərazisi - Dəniz kənarı yoldan istifadə etməsələri xahiş olunur.

Qeyd edək ki, artıq uzun müddətdir ki, Ceyhun Səlimov küçəsi də Hərbi hospitalın qarşısından 3-cü mikrorayon dairəsi istiqamətində ərazidə yeni metro stansiyasının tikintisi ilə əlaqədar bağlıdır.

Sürücülərdə sadalanan hərəkət istəqaməti üzrə alternativ yollardan istifadə etmələri tövsiyə olunur.