Sfera.az bildirir ki, bu cür evlərin qiyməti digərləri ilə müqayisədə 2 dəfə aşağıdır. Kubik və daşdan istifadə olunmayan bu evlərin 12 ballıq zəlzələyə davamlı olduğu, 100 ilədək qarantiyasının olduğu söylənilir. Təmirsiz evlərin kvadrat metrinin qiyməti 340, sadə təmirli evlərin kvadrat metrinin qiyməti 380, super təmirli evlərin kvadrat metrinin qiyməti isə 460 manatdır. Bakı ilə yanaşı bu evlərin bölgələrdə quraşdırılması üçün sifarişlər qəbul olunur. Quraşdırılan bu evlərin divarlarının qalınlığı 10 santimetrdir. Belə evlər qışda isti, yayda isə sərin olur.

Bu gün bir çox gənc ailələr üçün evsizlik böyük problemdir. Daha dolğun məlumat almaq üçün bu cür evləri quraşdıran şirkətlərdən birinə müraciət edib, ərazidə çəkiliş apardıq.

Şirkət sahibinin sözlərinə görə onlar yalnız bu evlərin tikintisi və təmiri ilə məşğul olur. Torpaq sahəsi isə evə sahib olacaq şəxs tərəfindən alınır. Şirkətin sahibi suallarımızı cavablandıraraq bildirdi ki, evlərin tikintisində ağacdan istifadə edilmir: 

"Divarları Türkiyədən gətiririk, betopandır. Uzunömürlü materialdır. Bu cür evlərdə ağac materialından istifadə etmirik. Bu səbəbdən də belə evlərdə yanma ola bilməz. Dam örtüklərin alt hissəsi profil uqolniklərdən. Yer betondan olacaq. Məsələn 60 kvadratlıq ev üçün 70 kvadratlıq beton hissəsi töküləcək. Təmirsiz evlərdə tavan vurulur, seyf qapı, plastik pəncərələr qoyulur, hamam-tualet su təchizat sistemləri çəkilir, elektrik təchizatı ilə təmin olunur. Sadə remontlu evlərdə divar kağızı, emosiya vurulacaq, çıraq asılacaq, hamam kafeli, unitazı, tülpanı qoyulacaq. Super təmirdə isə duş kabina və digər əlavələr olacaq”. 

70 kvadratlıq sadə evin xərci isə 31 min manat olacaq. Kreditsiz satılan remontsuz evlər 15 günə, təmirli isə 25 günə hazır olunaraq təhvil verilir.