Bakıda “Biz sizi unutmadıq- 7” adlı bayram aksiyası keçirildi
15:10 / 06.03.2019
3245
Bakıda "Biz sizi unutmadıq- 7” adlı bayram aksiyası keçirildi Bu gün "Yeni Üfüq” Mənəvi İrsin Təbliği İctimai Birliyi səhər saat 06:00-dan başlayaraq qarşıdan gələn "8 Mart” - Beynəlxalq Qadınlar Günü münasibətilə Bakının müxtəlif yerlərində "Biz sizi unutmadıq - 7” adlı aksiya keçirib.
Birlikdən Sfera.az-a verilən məlumata görə, aksiya çərçivəsində "Yeni Üfüq” İB-nin üzvləri paytaxtın ayrı-ayrı küçələrində təmizlik işlərini həyata keçirən zəhmətkeş Azərbaycan qadınlarını təbrik ediblər. Aksiyanın əsas məqsədi "8 Mart” – Beynəlxalq Qadınlar Günü münasibətilə ən çox zəhmətə qatlaşan, paytaxtın təmizlənməsində hər zaman xüsusi xidmətləri olan fədakar anaları sevindirmək olub.
Birliyin sədri Sevinc Əzimbəyli bildirdi ki, artıq 7 ildir "8 Mart” bayramı öncəsi paytaxtda "Biz sizi unutmadıq” adlı aksiya həyata keçirilir: "Hər il bu aksiyanı həyata keçirməklə üzərimizdə daha çox haqqı olan mübariz xanımlarımıza cəmiyyətin biganə qalmadığını nümayiş etdiririk. Digər tərəfdən zəngin insanlarımıza bir mesaj veririk ki, şəhərin təmizlənməsində rolu olan analarımıza öz qayğılarını əsirgəməsinlər. Çox qürurverici haldır ki, bu il "Biz sizi unutmadıq –7” adlı aksiyaya onlarla xeyirsevər fədakar gənclərimiz dəstək olaraq fərdi şəkildə bu aksiyaya qoşulublar və öz həmrəyliklərini bildiriblər”.
Qeyd edək ki, aksiya zamanı Bakının müxtəlif küçələrində kommunal xidmət işçilərinə bayram hədiyyələri və qızılgüllər təqdim edilib.