“Azercell”in bölüşdürülməmiş mənfəəti dodaq uçuqladır
"Azercell Telekom” MMC 2016-cı ili 81 milyon 425 min manat xalis mənfəət ilə başa vurub. "Marja” xəbər verir ki, 2015-ci illə müqayisədə Azərbaycanın ən böyük mobil operatorunun xalis mənfəəti təxminən 3 dəfə azalıb. Azercell 2015-ci ildə 254 milyon 112 min manat xalis mənfəət əldə etmişdi.
Azercell 2015-ci ildə devalvasiya ilə əlaqədar olaraq böyük məbləğdə mənfəət əldə etmişdi (Pul vəsaitləri və onların ekvivalentləri üzrə xarici valyuta mübadiləsindən gəlir).
Şirkət ötən il 134 milyon 726 min manat mənfəət vergisi ödəyib (2015-də 318 milyon 746 min manat ödəmişdi).
2015-ci illə müqayisədə ötən il Azercell-in cəmi gəlirləri 410 milyon 859 min manatdan 392 milyon 880 min manata geriləyib (4,4% azalıb). Cəmi xərcləri isə 250 milyon 139 min manatdan 304 milyon 387 min manata yüksəlib.
AKTİVLƏRİ 1 MİLYARD MANATA YAXINLAŞIR
31 Dekabr 2016-cı il tarixinə Azercell-in cəmi aktivləri 921 milyon 619 min manat (2015-də 724 milyon 590 min manat idi), öhdəlikləri 73 milyon 524 min manat (2015-də 83 milyon 242 min manat idi), cəmi kapitalı isə 848 milyon 95 min manat təşkil edib. Cəmi kapitalın 806 milyon 15 min manatını bölüşdürülməmiş mənfəət təşkil edib.
Qeyd edək ki, Azercell Telekom-un bağlanmış Bank Standard-dakı hesabında pulu qalıb.
