Azərbaycanda bəzi kənd təsərrüfatı mallarının qiyməti ucuzlaşa bilər – PROQNOZ
11:51 / 13.03.2018
2435
Xəbər verdiyimiz kimi illik istehsal gücü 25 min ton olan və 26 nəfərin işlə təmin olunacağı "KƏHF” MMC müəssisəsində balıq yemi, gələcəkdə isə mal-qara üçün və digər növ yemlərin istehsalı nəzərdə tutulub. Müəssisənin yaradılmasına 12 milyon manat investisiya yönəldilib.
İqtisadiyyat Nazirliyinin Sahibkarlığa Kömək Milli Fondunun vəsaiti hesabına müəssisəyə 5,9 milyon manat məbləğində güzəştli kredit ayrılıb. Bundan başqa, müəssisəyə İnvestisiya Təşviqi Sənədi verilib ki, bu da sahibkara 1,2 milyon manat vəsaitə qənaət etmək imkanı yaradır.
Bəs yem zavodunun inşası kənd təsərrüfatı məhsullarının qiymətlərinə təsir edəcəkmi?
İqtisadçı-ekspert Natiq Cəfərli Sfera.az-a açıqlamasında bu zavodun ölkə iqtisadiyyatına təsirlərindən danışıb:
"İstər mal-qara, istərsə də quş yemi ilə bağlı olaraq Azərbaycanda kifayət qədər problem var. Çünki ölkədə yemin baha olması qiymətlərin də artmasına təsir edir. Son iki ildə bunu müşahidə etmişik. Ət məhsullarının qiymətindəki ciddi artım da yem çatışmazlığı və yem qiymətlərinin yüksək olması ilə əlaqədardır. Ənənəvi heyvandarlıqla məşğul olan rayonlarda texnki bitkilərin əkilməsinə start verilərkən ölkənin yem bazası daraldı ki, bu da qiymətlərin daha da artmasına səbəb oldu”.
N.Cəfərlinin sözlərinə görə, yem zavodunun inşası bu sahədə bir sıra ciddi problemlərin həll olunması ilə nəticələnəcək:
"Yeni zavodun inşası ilə normal qiymət siyasəti yürüdülsə, bazara daha keyfiyyətli yem çıxarılsa, qiymətlərdə də azalma müşahidə edəcəyik”.
Nigar Məhərrəm
Sfera.az
