Azərbaycan Respublikasının Mədəniyyət və Turizm Nazirliyi 2016-cı ilin 20-22 aprel tarixlərində Qazaxıstanın Almatı şəhərində keçirilən "KİTF 2016" beynəlxalq turizm sərgisində təmsil olunur.

"Qafqazinfo"nun məlumatına görə, sərgidə iştirak edən Azərbaycan nümayəndə heyətinin tərkibinə Nazirliyin Turizm şöbəsinin Turizm sənayesi ilə iş sektorunun müdiri Bəxtiyar Qılıncov, habelə "Millennium Tourism & Congress DMC”, "Falcon Travel", "The Tour", "Billur tour", "Geo travel" və "Flame Tour” turizm şirkətlərinin, eləcə də "Şahdağ" Turizm Mərkəzinin əməkdaşları daxildir. Bununla yanaşı, sərgidə "Çinar Hotel & SPA Naftalan” mehmanxanası ayrıca stenddə təmsil olunur.

Sərgidə 46 kv.m-lik sahədə ölkəmizin turizm imkanlarını əks etdirən xüsusi stend quraşdırılmışdır. Stendimizə baş çəkən qonaqlara Azərbaycan turizmini təbliğ edən ingilis və rus dillərində reklam-çap məhsulları təqdim olunur.

Qeyd edirik ki, 2015-ci il ərzində Qazaxıstandan ölkəmizə 27 mindən çox turist səfər etmişdir.

Bu il "KİTF 2016" sərgisində ölkəmizlə yanaşı, 31 ölkədən 300-dən artıq şirkət təmsil olunur. Qeyd edək ki, Mədəniyyət və Turizm Nazirliyi və yerli turizm şirkətləri artıq dördüncü dəfədir ki, "KİTF" beynəlxalq turizm sərgisində iştirak edir.