Azərbaycanın BMT-yə üzv qəbul edilməsinin 25-ci ildönümü münasibətilə BMT-nin Cenevrə bölməsində Millətlər Sarayının qarşısında yerləşən Ariana parkında Azərbaycan dövlətinin hədiyyəsi olan "Düşüncələr və arzular” adlı heykəltəraşlıq abidəsinin açılışı olub.

Bu barədə Sfera.az-a Mədəniyyət və Turizm Nazirliyindən məlumat verilib. Abidənin açılışında Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov, BMT-nin Cenevrə bölməsinin rəhbəri Mixael Möller, Mədəniyyət və Turizm naziri Əbülfəs Qarayev, ölkəmizin BMT-nin Cenevrə şəhərindəki bölməsində və digər beynəlxalq təşkilatlar yanında daimi nümayəndəsi Vaqif Sadıqov və başqaları iştirak edib.

Açılışda çıxış edən Mixael Möller Ariana parkındakı abidələr kolleksiyasını zənginləşdirən maraqlı incəsənət əsərini hədiyyə etdiyinə görə Azərbaycan dövlətinə təşəkkürünü bildirib.

Baş nazirin müavini Əli Həsənov isə Cenevrə bölməsinin rəhbəri Mixael Möllerə Azərbaycanın bu müraciətinə müsbət yanaşdığına görə təşəkkür edib.

Abidənin açılışından sonra qonaqlara ziyafət verilib. Ziyafət verilən zalda Azərbaycana həsr olunmuş fotosərgi nümayiş etdirilib.

Sfera.az