ANS-in aparıcısı Aytən Səfərova həmkarlarını tənqid edib.

Sfera.az-ın axşam.az-a istinadən məlumatına görə, uzun müddətdir efirdən uzaqlaşan və ana olmağa hazırlaşan aparıcı onları savadsızlıqda günahlandırıb:

“Bir müddətdir ki, bülletendəyəm. Bu vaxt ərzində yerli telekanallara baxmaq imkanım oldu. Çox məyusam. Nə qədər bisavad, rayon ləhcəsi ilə danışan, ən dəhşətlisi isə bu ləhcələrlə şit zarafatlar edən, bayağı yumor və jurnalistikaya qeyri-ciddi baxan zərzibalı, deffektlə danışan, cümləsinin əvvəli ilə sonu bilinməyən aparıcılar var imiş. Özü də görünür əcnəbi dildən xəbərləri yoxdur. Adi ölkələrin və şəhərlərin adlarını düzgün tələffüz etməkdə çətinlik çəkirlər. Zövqsüz aparıcılar var imiş. 19 il əvvəl mən ANS-də işə başlayanda və o vaxtkı jurnalist həmkarlarımı və aparıcıları görəndə, televiziyanın indiki səviyyəyə gəlib çatacağını ağlıma belə gətirməzdim. 

Azərbaycanımızın telekanallarında bu qədər bisavadlıq, həyasızlıq, nəzarətsizlik təsəvvür etmirəm. Heydər Əliyev senzuranın ləğvinə dair sənəd imzalayanda yeniyetmə idim, jurnalistikaya yeni qədəm qoymuşdum. Yaşlı nəsil, bu sahənin peşəkarları nə qədər sevinirdi. Amma əziz həmkarlar, senzuranın ləğvi o demək deyil ki, bəziləriniz özünüzü bu dərəcəyə gətirib çıxarmalısınız. Elə təsəvvür yaranıb ki, indi küçədən keçən istənilən şəxs gəlib ekrana çıxa bilər. Çox məyusam. Mənəvi stress keçirirəm. İstisna olan barmaqla sayılacaq həmkarlarıma isə çoxluğa boyun əyməyib, öz şərəfli yollarında davam etməyi arzulayıram”.