Nəqliyyat eksperti Eldəniz Cəfər Sfera.az-a açıqlamasında deyib ki, qeyd edilən təklif yaxşı təşəbbüsdür. Müsahibimizin fikrinə görə, ümumiyyətlə, nömrə verilməsi məsələsində xarici ölkələrin təcrübəsindən bəhrələnmək olar:

"Dövlət nömrə nişanlarının xüsusi maraq kəsb etdiyi ölkələrdə nömrələr asanlıqla, konkret rüsumla vətəndaşlara verilir. Düşünürəm ki, Azərbaycanda da bu tətbiq edilməlidir. Faktiki olaraq, problemi həll etmək üçün vətəndaşların da sözü bir olmalıdır. Yəni nömrələrin ASAN xidmətə verilməsinimi istəyirlər, yoxsa yol polisi tərəfindən alınmasınımı?

Əlbəttə, bu gün Azərbaycanda bir çox xidmətlər ASAN xidmət tərəfindən həyata keçirilir. Nəinki, nömrələr, hətta sürücülük vəsiqələrinin verilməsi də bu xidmətə həvalə edilməlidir. Düzdür, sürücülük vəsiqəsinin verilməsi ASAN xidmət tərəfindən həyata keçirilir, lakin ilkin olaraq imtahanlar belə orada keçirilsə, daha yaxşı olar. Bu, prosesi sadələşdirir. Onsuz da nəticədə dövlət rüsumu dövlət büdcəsinə gedir”.

Ekspert vurğulayıb ki, "ASAN” mərkəzləşmiş xidmətdir və əhalinin ona etibarı var:

"Bu baxımdan dövlət qeydiyyat nişanlarının bu mərkəzə verilməsi və əldə edilən gəlirlərin YAŞAT Fonduna köçürülməsi yaxşı təşəbbüs olardı”.

Azərbaycan İnternet Forumunun prezidenti Osman Gündüz deyib ki, DİN-in son addımlarının heç biri müasir çağırışlarla ayaqlaşmır və bu qurum xidmətlərin rəqəmsal versiyasına diqqət yetirmir:

"DİN hələ də klassik ənənələrə üstünlük verir. Elektron hökumətə cavabdeh "eGov” Mərkəzi isə sanki xidmətlərin rəqəmsallaşmasını unudub. İndiyədək də,  dəfələrlə təkrarlanmasına baxmayaraq, DİN avtomobillərin dövlət qeydiyyatına alınması, dövlət nömrə nişanlarının verilməsi xidmətini rəqəmsallaşdırmayıb.  Hələ də cəlbedici nömrələr üzrə şəffaf bir sistem formalaşmayıb. Hansı ki, bu xidmətləri rəqəmsal etmək üçün DİN-nin əlində yetərincə texniki texnoloji və kadr resursları var.

Maraqlı məqam odur ki, DİN "eGov” Mərkəzinin yaratdığı Asan Login sisteminə də qoşulmayıb. MyGov-da DİN yoxdur. "eGov” portalında DİN-nin cəmi 3 xidməti görünür. DİN iddia edir ki, onun ayrıca, separat formada e-Xidmət mərkəzi var”.

O.Gündüz vurğulayıb ki, DİN və "eGov” Mərkəzi ayrılıqda fəaliyyətə son qoymalı, mahiyyətcə  kütləvi olan, ictimai əhəmiyyət kəsb edən xidmətlər elektronlaşmalı və maşın nömrələri üçün auksion satış sistemi təşkil olunmalıdır.