Avqustun 13-də AZƏRTAC Azərbaycan Prezidenti Mətbuat Xidmətinin məlumatını yaydı. Məlumatda bildirildiyi kimi,Azərbaycan Prezidenti cənab İlham Əliyev Rusiya Federasiyasının Prezidenti cənab Vladimir Putinə telefonla zəng etmişdi.Təşəbbüs Azərbaycan Prezidentinə məxsusdur. Telefon zənginin məqsədi cəmiyyətimizdə ciddi narahatlığa və əsaslı suallara səbəb olmuş məqamları Rusiya rəhbərliyinin nəzərinə  çatdırmaqdan ibarət idi.Bu narahatlığın səbəbi odur ki, Ermənistanın Tovuz rayonu istiqamətindəki təxribatından sonra-iyulun 17-dən etibarən Rusiyadan Ermənistana Qazaxıstan,Türkmənistan və İranın hava məkanlarından istifadə etməklə 7 reyslə 400 ton həcmində hərbi  yük göndərilib.Şübhəsiz ki,təsbit edilmiş bu faktlar Azərbaycan və Rusiya arasındakı müttəfiqlik münasibətlərinə,Rusiyanın Ermənistan-Azərbaycan münaqişəsinin həllində ATƏT-in Minsk Qrupunun həmsədlərindən biri kimi üzərinə götürdüyü öhdəliklərə uyğun gəlmir,əksinə onlarla ziddiyyət təşkil edir.

Xüsusi xidmət orqanlarımızın müəyyən etdiyi faktlardan biri də odur ki, son 15 ildə Ermənistan dünyada ən çox silahlanan ölkələr arasında yer almaqdadır.Bu fakt Almaniyada fəaliyyət göstərən "Bonn İnternational Center for Conversion”(BICC) təşkilatının hazırladığı məruzədə də təsdiqini tapır.Məruzəyə əsasən, 2007-2009-cu illərdə dünya üzrə silahlanma yarışında Ermənistan 8-ci yerdə qərarlaşmışdısa,2012-2014-cü illərdə 4-cü yerə yüksəlmişdir.2014-cü ildən etibarən Ermənistan davamlı olaraq bu göstərici üzrə 3-cü yerdədir.Bu göstəricilər Ermənistanın rəsmi silah alışına dair hesabatına da tam  uyğundur.Bütün bunlardan əlavə,təcavüzkar və işğalçı Ermənistan müxtəlif ölkələrdən,xüsusən də müttəfiqlərindən gizli şəkildə dünya bazar qiymətlərindən daha ucuz silah almaqda davam edir.İyulun 17-dən avqustun 4-dək Rusiyadan Ermənistana daxil olmuş hərbi yük də bu qəbildəndir.

Digər bir fakt isə Azərbaycanla strateji müttəfiqlik iddiasında olan Serbiyanın Ermənistana ağır döyüş silahları,o cümlədən minaatanlar satması ilə bağlıdır. Serbiyanın ölkəmizdəki müvəqqəti işlər vəkili Danitsa Veinoviçin Xarici İşlər nazirliyimizə dəvət olunaraq əsaslı iradlarımızın onun diqqətinə çatdırılması,kəskin etirazımızın bildirilməsi ciddi diplomatik addım idi .Ölkəmizin etirazının faktlara söykənməsi onunla nəticələndi ki,avqustun 7-də Serbiya Prezidenti cənab Aleksandr Vuçiç Prezident cənab İlham Əliyevə telefonla zəng etdi və müttəfiqlik münasibətlərinə uyğun gəlməyən addımlarına aydınlıq gətirmək məcburiyyətində qaldı.Ardınca isə Serbiya Baş nazirinin müavini,Milli Təhlükəsizlik Şurasının katibi və Daxili İşlər naziri Neboyşa Stefanoviçi ölkəmizə ezam etdi.

Yaranmış vəziyyət onu göstərir ki, ATƏT-in Minsk Qrupunda təmsil olunan  həmsədr ölkələrdən bəziləri  vasitəçilik missiyasının tərəfsizlik anlamına lazımınca diqqət yetirmirlər və bunun da cəmiyyətimizdə ciddi narahatlıq doğurması təsadüfi deyil,anlaşılandır və Azərbaycanı müvafiq nəticələr çıxarmağa sövq edir.

Milli Məclisin deputatı Ülvi Quliyev