Ankaranın Qətərlə bağlı bu amili ciddi faktordur: Tehran ABŞ-a öz mesajını verəcək...
13:57 / 10.06.2017
2273
"Türkiyənin Qətərlə iqtisadi platformada ciddi müttəfiq münasibətləri var. Şübhəsiz ki, rəsmi Ankaranın atdığı addımlarda bu amil də son dərəcə ciddi faktor olaraq qəbul edilməlidir".
Bu sözləri Sfera.az-a açıqlamasında analitik Vüqar Zifəroğlu deyib.
O bildirib ki, hər iki ölkə arasında 2014-cü ildə hərbi razılaşma olub:
"Bu gün kiçik sayda olsa belə türk hərbi kontingentinin Qətər ərazisinə yerləşdirilməsi, əslində həmin müqavilənin şərtlərinin irəli çəkilməsi ilə izah oluna bilər. Lakin burada əslində cavabı verilməli olan sual başqadır: Türkiyənin ərəb qarşıdurmasında bu qədər açıq şəkildə tərəf tutması nə dərəcədə doğrudur?
Təbii ki, bu suala cavablar müxtəlif ola bilər və fikirlərin əsaslandırılması üçün gətirilən arqumenlər də müxtəlifdir. Hər halda Ankaranın daha loyal mövqe sərgiləyərək digər ərəb ölkələri, xüsusilə də ticari dövriyyəsi kifayət qədər yüksək olan Səudiyyə Ərəbistanı ilə münasibətlərinə xələl gətirməyəcək dərəcədə neytrallıq nümayiş etdirməsi daha doğru olardı".
Onun sözlərinə görə, ABŞ İrana olan münasibətində təzyiqləri artıracaq:
"Lakin bu o demək deyil ki, Tehran buna səssiz qalacaq və baş verənlərlə razılaşacaq. Artıq neçə gündür ki, İrandan müxtəlif ziddiyyətli xəbərlər gəlir. Hər halda Tehran öz mesajını verəcək".
Qeyd edək ki, hazırda bir çox Körfəz ölkəsi Qətərlə münasibətləri dayandırıb. Buna səbəb kimi Qətərin terrorizmi maliyələşdirməsi əsas göstərilir.
Gülnarə Eynullaqızı
Sfera.az
