Təhsil Nazirliyinin “Elmdən Təhsilə” layihəsi çərçivəsində tələbələr üçün “Novruz mühazirələri”nə başlanılması nəzərdə tutulur.

"Qafqazinfo"ya daxil olan məlumata görə, mühazirələr tanınmış elm adamları, millət vəkilləri, təhsil ekspertləri tərəfindən təhsildə qlobal trendlər, nanotexnologiyalar, tarix, iqtisadiyyat, təhsilin idarəolunması, təhsildə rəqabətəqabiliyyətlilik, multikulturalizm, ali təhsildə beynəlmiləlləşmə və digər populyar elmi mövzular üzrə ölkənin müxtəlif elm və təhsil müəssisələrində aparılacaq.

“Novruz mühazirələri”nin məqsədi nüfuzlu elm adamlarının vasitəsilə elmi mövzuların ali məktəb tələbələrinə, ictimaiyyətin digər nümayəndələrinə daha sadə formada çatdırılması, gənclərin elmə, elmi-tədqiqatlara marağının artırılmasından, hərtərəfli dünyagörüşünün formalaşdırılmasından ibarətdir.

Qeyd edək ki, müvafiq mühazirələr “Milad mühazirələri” (Christmas lectures) adı ilə Böyük Britaniyada məşhurdur. Əsası 1825-ci ildə M. Faradey tərəfindən qoyulan bu mühazirələri Böyük Britaniyanın Kral İnstitutu dəstəkləyir və Rİ televiziyası şəbəkəsi tərəfindən yayımlanır.

Azərbaycanda da Azad Mirzəcanzadə, Rafiq Əliyevin, Mirəli Seyidov, Yusif Yusifov, Bəxtiyar Vahabzadə, Mahmud İsmayılov, Lətif Kərimov və başqa tanınmış alimlərin mühazirələrinin dinlənilməsi ənənəsi olmuşdur.