Ermənistanda aprelin 2-nə təyin edilmiş parlament seçkilərinin təxirə salınması məsələsinə baxıla bilər.

Sfera.az virtualaz.org-a istinadən xəbər verir ki, bu barədə hakim Respublika partiyasının fraksiya rəhbəri Eduard Şarmazanov jurnalistlərə bildirib.

Ermənistanda seçkilər konstitusiyada müəyyən edilmiş normalara görə, aprelin 2-nə təyin edilib. Lakin həmin gün Ermənistan üçün qara gündür - Azərbaycan ordusu məhz aprelin 2-də təmas xəttinin iki istiqamətindən əks-hücuma keçərək erməni ordusunun uzun illərdir möhkəmləndirilmiş müdafiə xəttini darmadağın edib, onu ciddi itkilərə məruz qoyub və müəyyən əraziləri işğaldan qurtarıb. Bu səbəbdən Ermənistanda bəzi siyasi qüvvələr seçkilərin aprelin 2-nə təyin edilməsindən narazılıq ifadə edirlər.

Şarmazanov hakim partiyanın Ali Şurasının iclasından sonra bildirib ki, əgər bütün siyasi qüvvələr istəsə, seçkilərin təxirə salınması mümkündür. "Əgər istisnasız olaraq bütün siyasi oyunçular razılıq əldə etsələr ki, aprelin 2-nə təsadüf edən seçkilər iki gün, dörd gün və ya beş gün təxirə salınsın, o zaman Respublika partiyası bunda hansısa siyasi maneə görmür. Biz bu məsələni bütün siyasi qüvvələrlə müzakirə etməyə hazırıq", - o bildirib.

Xatırladaq ki, aprel döyüşlərinin nəticəsi olaraq Ermənistan Müdafiə Nazirliyinin bir neçə generalı işdən çıxarılıb, həbs olunub. Nəhayət müdafiə naziri Seyran Ohanyan istefaya göndərilib.